Гепатологтар/гастроэнтерологтар VII Ұлттық Конгресі «Gastro Hepato Transplant News 2024» өз жұмысын аяқтады. Бұл маңызды ауқымды шара қолданбалы ғылыми зерттеулер мен клиникалық қызметтегі тәжірибе алмасу және талқылау үшін бірегей алаңға айналды, халықаралық медициналық қауымдастық өкілдерін – ғалымдарды, дәрігерлерді, денсаулық сақтау менеджерлерін біріктірді.

Конгресс бағдарламасы қатысушылар құрамы мен баяндамалардың мазмұны бойынша жеткілікті түрде қанық болды. Шақырылған қатысушылардың ішінде профессорлар, ғалымдар, жетекші сарапшылар және тәжірибелі дәрігерлер – гастроэнтерологтар, гепатологтар, эндоскопистер, онкологтар, хирургтер, трансплантологтар Германия, АҚШ, Түркия, Ресей, Өзбекстан, Қазақстаннан болды.

Спикерлердің баяндамаларында гепатология мен гастроэнтерологиядағы ең маңызды мәселелер бойынша ғылыми зерттеулер мен клиникалық тәжірибе ұсынылды. Атап айтқанда, Гейдельберг университет клиникасының профессоры А. Тойфель вирус гепатиттерін және алғашқы бауыр қатерлі ісігін басқару тәжірибесімен бөлісті. Көрермендердің қызығушылығын Өзбекстан Ұлттық Ғылым академиясының академигі, профессор Э. Мусабаевтың Өзбекстанның вирус гепатиттерін жою жөніндегі ұлттық бағдарламасын іске асыру туралы баяндамасы тудырды. B және D гепатиттерін басқару мәселелері, бауыр мен ішектің аутоиммундық байланыстары Аахен университет клиникасының профессоры К. Есмембетовтың баяндамаларында ұсынылды. Түркияның Аджибадем клиникасынан келген әріптестер, атап айтқанда профессор М. Кылыч бауыр трансплантациясынан кейінгі иммуносупрессивті терапияны жүргізу тәжірибесімен бөлісті. Конгресс бағдарламасының маңызды бөлігі жоғары технологиялық емдеу әдістерін қолдана отырып, бауырдағы алдын ала және қатерлі ісіктер бойынша теориялық және практикалық мастер-класстарды көрсету болды.

Конгресс барысында маңызды оқиға ретінде Гейдельберг университет клиникасымен (Германия) ынтымақтастық туралы меморандумға қол қойылды. Екі клиниканың онкогепатологиялық қызмет бойынша жоғары білікті мамандарды даярлау жөніндегі өзара күш-жігерін шоғырландыру - бұл бірлескен ауқымды жобаның бір бөлігі ғана.

Серіктестік шеңберінде ҰҒОО дәрігерлеріне консультациялық-эксперттік қолдау көрсету және күрделі клиникалық жағдайлар бойынша бірлескен консилиумдар өткізу мүмкіндігі қарастырылған. ҰҒОО жас дәрігерлер-резиденттері үшін Гейдельберг университет клиникасында білім беру бағдарламаларына қатысу және клиникалық тәжірибе алу мүмкіндіктері ашылады. Мұндай жемісті ынтымақтастықты онкогепатология және гастроэнтерология орталығының алдына қойылған міндеттерді ескере отырып, асыра бағалау қиын, өйткені ол Қазақстандағы гепатологиялық және гастроэнтерологиялық қызметтің ұлттық үйлестірушісі ретінде онкологиядағы осы жоғары мамандандырылған бағытты қалыптастыруға және әдістемелік сүйемелдеуге жауап береді. Осылайша, Гейдельберг университет клиникасымен серіктестік орнату маңызды стратегиялық қадам болып табылады және ҰҒОО дәрігерлері мен мамандарының ғылыми және білім беру әлеуетін дамытуға елеулі үлес қосады.

Ақпарат көзі: Ұлттық ғылыми онкология орталығының баспасөз қызметі